Varios persona herida y tambe deteni, despues di bringamento pa un problema ariba caminda di Sasaki

Palm Beach – Diadomingo marduga pa mas o menos 4:30, polis bayendo un asistencia altura di Molen ta presencia un susedido altura di luz di trafico na Wendy’ Palm Beach.

Loke patruya a presencia tawata cu un auto a bay pega ariba un di e luznan di trafico y un otro lo a pasa cu velocidad halto direccion Marriott dal e y bay.
Mirando kiko a pasa, nan a desvia y a bay tras di e auto un Mitsubishi Colt.

Algun minuut despues di a sigui e auto Mitsubishi, polisnan a realisa cu ta trata di un problema hopi serio y tin hende herida.
Polisnan a papia di reglamento di cuenta entre gang members.

Mirando cu ta un grupo, mes ora refuerzo a wordo manda di tur parti cu tawata por.
Den un rato cortico, e area di luz di trafico tawata bou di luznan blauw di autonan di polis.

Dilanti Unicasa, por a wak polisnan rond di un Altezza color blanco y dos persona abou sinta.

Den e Colt tawata tin tres hoben, un di nan a tawata tin kap ariba cabes, otro tawata tin su man full na sanger, y e di tres no por a wak sanger na su curpa. Segun nan, nan a core pa nan bida, kiko nan kiermen no ta duidelijk.

Despues di un rato esnan herida, tur a haya ordo di polis pa drumi ariba nan barica, mientras ambulance ta yegando.

Version di un di esnan cu tawata envolvi den e problema

Un rato prome ariba Sasaki altura di Red Fish altura di e cosnan di plastic cu ta separa e caminda, eynan problema a cuminsa.
Segun e persona a splica, parse cu e Mitsubishi Colt a hera dal nan tras, esta e Hyundai Accent blauw y e Altezza color blanco tawata core hunto.

Parse cu tawata tin Fever of Driftmento y a hera dal, contra e Accent y of e Altezza, asina e baina a cuminsa. Y segun nan version, “nan” a baha for di auto y kapnan cu machete. Enberdad por wak esnan den e Colt ta sangra y cu kap na cabes y e otro na su man.

Eynan menasa a cay cu nan nan lo bay “blasnan” (wordo tira). Parse cu e pelea a caba e ora eynan y tur hende a subi nan auto y sigui bay direccion nort, esaki ta version di un di esnan envolvi.
Yegando na e luznan di trafico di Palm Beach, esnan den e Accent ta mira con duro e Mitsubishi Colt tawata biniendo nan direccion. Akinan e chauffeur a bira wak patras y ta perde control bay pega contra e luz di trafico, kibrando e auto completamente.

E momento eynan, ta ora cu a patruya a mira mas o menos kiko a pasa. Akinan e Mitsubishi Colt a pasa dal e Accent y sigui bay.
E momento eynan dos persona ta baha for di e Accent.
Polis ta haya informacion e momento ey cu tawata trata di pelea y cu tin hende a word gekap.

Polisnan a detene algun di esnana envolvi y nan a wordo hiba warda di Shaba.
E tresnan cu tawata ariba vloer, tur a bay hospitaal cu ambulance.

Chauffeur di e Accent segun nos a compronde ta e unico cu a keda y lo mester a zorg pa takelwagen move e auto y hibe cas. Lamentablemente mester bisa cu e Accent ta auto cu e cabayero a fia di su mama pa bay dal un trip.

Leave a Reply

Your email address will not be published. Required fields are marked *

*