Propetario di Fam P, tawata grita insulta y intimida polisnan ora a bay pa cera su club

Palm Beach- Diahuebs marduga polisnan di districto di Noord un biaha mas ta haya nan den situacionann fastioso, esaki ta momento cu nan mester hala atencion establecimentonan nocturno, ariba e orario cu nan mester cera.

Diahuebs marduga atrobe agentenan di districto di Noord ta haya nan den baina, momento cu nan a spot cu Olde Molen cu mester a cera 3’or di maruga ainda tawata habri, caminda musica tawata bati bay.
Polisnan a mustra nan presencia door di para dilanti e luga y cende nan zwaailicht, niun hende no a worry y musica a sigi bati bay.
Agentenan a acerca e bouncernan, esakinan tampoco no a haci caso di nan y musica ta sigi bati.
Agentenan a papia cu e manager e ora, esaki tampoco a worry cu e agentenan y a bisa di lo yama e conocido doño di Fam P.
E doño di Fam P a yega na e sitio y mes ora a cuminsa ta insulta y grita e agentenan cu nan ta stroba su negoshi di gana placa. Tambe ela laga sa cu e lo no bay cera su luga sin un pelea. P a sigi bisa cu otro localidadnan a keda habri mas largo durante e dianan di fiesta y cu e tambe tin derecho di haci esaki.
P tawata hopi emociona y tawata keda grita y insulta e agentenan manera e tawata haya ta bon. E la bisa e agentenan cu nan lo no por hacie nada y cu nan mester purba di detene sin uniform.
Agentenan varios biaha a hala su atencion y mustre ariba su comportacion. Polisnan mirando cu nan tawata den menoria y P tawata rondona pa su bouncernan y mas hende, agentenan a opta pa avisa nan wacht commandant.
Na yegada di wacht commandant cu tin rango halto P a calma y su actitud a cambia, pues e no tawata grita nada mas e momento ey. Wacht commandant a papia duro cune y despues di un rato musica a wordo paga.
Carga awa hiba lama
 
Polisnan di Noord lo keda haya nan mes den tipo di problemanan aki, esta cu bouncernan y tambe doñonan di luganan nocturno cu no ta mustra  niun respet pa autoridad y nan ta keda haci loke nan kier.
Nos ta premira cu cambionan serio lo mester bay tuma luga di parti di autoridad den 2017.

Leave a Reply

Your email address will not be published. Required fields are marked *

*