PRESS RELEASE ‘Crossing for Hope’ dia 11 di november 2018

PRESS RELEASE

‘Crossing for Hope’ dia 11 di november 2018

ORANJESTAD (AAN)– E aña aki 11 di november 2018, 5 landado di e club di natacion Aruba Dolphins 1) Gwendolin Kock-Croes; 2) Romar Arendsz; 3) Deaxo Croes; 4) Davy Bisslik; 5) Stephan Thijsen bou di e supervicion y guia di Sr. Roly Bisslik lo bolbe ripiti e hazaña cu Roly a haci 30 aña pasa, cual ta landa di Venezuela pa Aruba.

E meta principal di e hazaña aki ta pa recauda fondo pa Koningin Wilhelmina Fonds (KWF). Cu e fondo recauda aki lo yuda KWF cubri gastonan di operacion anual. Apart di esaki KWF tin deseonan grandi cu solamente cu sosten di pueblo di Aruba lo por bira realidad. Pa menciona algun: traha ariba proyectonan di conscientisacion y prevencion, introduci un App, habri un oficina di KWF na San Nicolas y organisa un conferencia.

Tur persona cu ta desea di aporta na e bon causa aki por haci donacion na cuenta di banco di Koningin Wilhelmina Fonds y menciona ‘Crossing for Hope’. Cuentanan di banco ta: CMB 60078005; – Banco di Caribe 80710901; – Aruba Bank 2611450190. Di curason danki pa bo(so) noble contribucion.

Pueblo di Aruba ta invita pa presencia e yegada di e 5 landadonan dia 11 di november 2018. E punto di yegada lo ta den area di Zeerovers, Savaneta. Nos tin un actividad familiar prepara cu musica, cuminda, cos di bebe y actividad pa mucha. E actividad ta di 11:00 am pa 5:00 pm. Nos ta spera e prome landado pa mas o menos 3:00 pm si stroom y ola coopera. Ariba e dia aki tambe bo lo por haci bo donacion.

Nos no por lubida di recorda e botonan cu lo desea di presencia e landa aki entre Venezuela y Aruba pa percura pa regla tur papel oficial cu Consulado y Douane. Algun punto cu mester tene cuenta cu ne pa no stroba e landadonan ta: keda cu un distancia di por lo menos 100 meter di e landadonan; no core duro pa lanta mas ola; core ‘downwind’ pa e holo di gasolin/diesel no molestia e landadonan.

Pa keda na altura di tur desaroyo te cu dia 11 di november, like y follow e facebook page y instagram di ‘Crossing for Hope’. E landadonan y KWF ta conta cu boso sosten.

 

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.