Polis ta topa cu boto laga atras ariba rif banda di santana di cacho

Seroe Colorado – Diahuebs marduga durante control di rutina den Sero Colorado, patruya di San Nicolas ta topa cu un lancha pega ariba rif. Esaki tawata dilanti Santana di Cacho.

Mesora a pidi pa mas patruya yega na e sitio pa yuda y scuridad tabata obstaculisando e polisnan pa mira kiko tabata tin den e boto. Despues dos patruya a yega, dos agente a drenta e lama y cana bay poco poco ariba rif pa yega e boto. Algo sigur den oranan di anochi y cu scuridad sumamente peligroso.

Den e boto nan a mira algun container di gasolin y por a haya e holor fuerte te na canto.
E dos motornan ainda tabata pega, loke hopi biaha nan sa haci, pues laga boto y motor atras.
Nomber di e boto ta “Mi Fortalesa”.

Lama tawata hopi bruto, pero asina mes un cantidad desconoci a bolbe drenta Aruba, y ta puntra kiko tur nan a trece cu nan.
Na e sitio nos a haya informacion, cu e boto lo por tin 2 ora of mas cu elo a yega.

Con nan por a drenta si tin Radar y Kustwacht ta e pregunta cu tur persona a haci y lo bay haci.

Di fuente fededigno, nos a haya informacion cu Kustwacht no tawata trahando, dus ningun hende pa controla nada.

Casualidad, Leak, of puro suerte ?
Un otro biaha, cu tambe a bin topa cu un boto laga atras, den e mes un area tampoco Kustwacht tawata trahando.

Awor nos ta puntra, e lancha aki tawata tin puro suerte, di por a drenta sin cu ningun hende cu ta biba den Colony mes por a mira algo sospechoso diaranson anochi laat ?

Sero Colorado di e manera aki ta bira un area hopi unsafe den oranan laat di anochi. Paso manera a pasa diaranson anochi laat pa diahuebs, den pasado tambe ela yega di pasa. Nos no sa ken e hendenan aki ta y kiko tur nan ta capas di haci.

No solamente hende ta drenta, pero tambe armanan di candela, droga, y hasta animalnan. Nos por corda ainda algun siman pasa, cu un lancha a drenta na Boca Prins, caminda varios cacho cu nan kier a drentanan a hoga.

Lamentablemente mester bisa, cu atrobe Aruba tin algun persona indocumenta rond, y cu ta wordo yuda door nos mes un hendenan.

Leave a Reply

Your email address will not be published. Required fields are marked *

*