Polis ta haya Jeep procedente di ladronicia staciona den Ranchostraat

Oranjestad: Diasabra pa mas o menos 9’or y mey, polis ta wordo manda den area di Ranchostraat, pa motibo cu nan lo a mira un Jeep Wrangler procedente di ladronicia ta coriendo rond den Rancho, varios unidad di polis a bay den e area aki.

Un rato despues cu polis a caba di pasa controla den Ranchostraat y no a haya nada, un patruya di polis a dicidi di pasa un biaha mas den Ranchostraat y e biaha aki si nan a canta bingo. E patruya a bin topa cu e Jeep Wrangler Blanco, cu e radio di auto cendi y e capa di motor ainda tabata cayente, indicando cu ta un rato prome e Jeep aki a wordo staciona den Ranchostraat.

Mesora e polisnan a cuminsa puntra den e caya ken por a laga e jeep atras, pero manera cu ta custumber den e area aki, niun hende no a mira y ni a tende nada. Polis a confisca e jeep y a pidi mesora pa un takelwagen hibe warda di polis pa mas investigacion.

E jeep Wrangler aki a wordo horta diabierna anochi for di Lagoenweg, e doñonan tin hopi suerte di por a haya su jeep completo y hopi liher bek. Varios biaha e autonan cu wordo horta, ta wordo pluma y laga atras den mondi of lugarnan bandona.

Leave a Reply

Your email address will not be published. Required fields are marked *

*