Persbericht Bunita encuentro pa despedida pa mentor Edy Ranada

Datum: 25 oktober 2018

Contactpersoon: Sidney E. Kock

Telefoon: 070 – 356 62 15

Fax: 070 – 345 14 46

Persbericht

Bunita encuentro pa despedida pa mentor Edy Ranada

Den Haag –Na Arubahuis a tuma lugar un recepcion hopi ameno pa tuma despedida di Edy Ranada cu ta studiementor pa Amsterdam, Enschede, Deventer y Zwolle. Edy ta baha cu pensioen despues di 30 aña cu ela traha como studiementor pa Arubahuis. Esaki a tuma lugar den presencia di Minister Plenipotenciario Guillfred Besaril, director a.i. di Arubahuis Glenn Ling, personal di Arubahuis y ATA, collega studiementornan y casi tur ex-mentornan cu ta biba na Hulanda.

Minister Plenipotenciario Guillfred Besaril a haci entrega di un plakkaat na Edy como aprecio y gratitud pa e añanan di dedicacion na guia di studiantenan Arubano na Hulanda.

E mandatario a para keto den su discurso na e tarea di un studiementor cu ta un persona di confiansa pa e studiante. Guia di studiante ta rekeri hopi dedicacion pasobra bo ta hayabo confronta cu diferente situacionnan. ‘Den tur sentido Edy a demostra di tabata tin e capacidad pa duna guia y sosten pa asina e studiante por a sigi y finalisa nan estudio cu exito,’ asina sr. Besaril a bisa.

Minister Besaril a papia di un sentimento mixto pa mira un persona cu asina hopi experencia bai y na mesun momento e ta un ocacion pa gradici e personan na un manera festivo pa tur su trabao cu ela haci den tur e añanan aki.

Sr. Besaril den nomber di Gobierno di Aruba, en especial den nomber di minister di Enseñansa dr. Armando Lampe, staf y personal di Arubahuis a gradici Edy pa e añanan di trabao como studiementor y cu Edy disfruta di su pensioen bon mereci.

Studiementor John Dirks a tene un discurso den nomber di e otro studiementornan. Na e ocacion aki sr. Dirks a para keto na e hecho cu Edy semper tabata dispuesto pa comparti su experencia y duna aviso na e grupo di mentor nobo cu a keda apunta na 2003. Finalmente John Dirks y a haci entrega den nomber di e studiementornan un regalo na Edy.

Despues di e momento aki a sigi cu e parti den e programa unda cu tabata tin mensahe di diferente persona cu den e 30 añanan a traha cu Edy, manera Casper Croeze di Departamento di Enseñansa di Aruba, Miro Dabian ex coordinador di Enseñansa na Arubahuis, algun studiantenan cu semper a yuda Edy den POC (Plaatselijk Opvangcommissie) y Gobernador di Aruba Alfonso Boekhoudt, kende a conoce Edy tempo cu sr. Boekhoudt tabata traha den Enseñansa na Arubahuis.

Finalmente Edy a gradici tur hende pa e bunita recepcion y a bisa cu ela haci e trabao aki pa tur e añanan cu hopi amor y dedicacion pa e studiantenan.

Lourdes Bramble-Tromp ta susesor di Edy pa guia di studiantenan na Amsterdam, Diemen, Enschede, Deventer y Zwolle.

Nota pa redacion: E potretnan ta cortesia di Cas di Aruba

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.