Ministerionan di Asunto Social y di Enseñansa a reuni den cuadro di e Crisisplan Social

Ministerionan di Asunto Social y di Enseñansa a reuni den cuadro di e Crisisplan Social

Recientemente Minister di Asunto Social conhuntamente cu Minister di Enseñansa a reuni cu entre otro Departamento di Asunto Social y Bureau Sostenemi cu e meta pa por tin un ehecucion cu mayor efectividad di e Crisisplan Social.

E problemanan social na Aruba ta grandi, nan ta multiple y nan ta amplio. Aspectonan di nos Pais cu pa e ultimo añanan no a ricibi ningun clase di atencion. Problemanan cu a wordo neglisha cu awe a resulta den un realidad amargo. Tapando wowo, birando cara bo no ta resolve e problema. Construyendo caretera y traha stupi di klinker no ta soluciona e problema. Al contrario. Bo construccion tabata meramente cosmetico mientras cu e problemanan tabata intensificando.

Desde cu Minister Glenbert Croes a asumi e cartera social, di biaha el a hay’e confronta cu e gravedad di e problema di nos pais. Nos tin dos angelito den cielo a consecuencia di e falta di interes di Gobierno anterior pa atende cu e aspectonan cu tabata sclama pa atencion. Pero e mandatario, apesar cu e no ta un experto riba tereno social, a actua. El a dicidi di yama tur stakeholder aden pa por scucha tur nan preocupacionnan, pa por scucha tur locual ta nan proposicionnan cu a resulta den e Crisisplan Social. Pero asina mes, ta den practica, scuchando cada ken nan expertisio, bo ta haya sa na unda mester mehora e ehecucion di e crisisplan pa sigura cu e solucionnan ta yega unda cu realmente tin mas mester di dje.

Esey pues tabata e meta di e reunion pa sigura cu ta deshaci di tur obstaculo pa percura cu e proceso dje ehecucion tin su continuidad pa hunto yega na e resultadonan desea pa miho di nos hendenan y nos pais. Durante e reunion e mandatario a gradici Minister di Enseñansa pa su apoyo, cooperacion y atencion pa e problemanan social na nos scolnan. “Hunto nos ta logra un miho pais pa nos yiunan y nos nietonan” Minister Glenbert Croes a expresa.

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.