Minister Ruiz-Maduro a informa ATIA riba trabaonan di e reforma fiscal di nos pais

COMUNICADO DI PRENSA

Durante un reunion:

Minister Ruiz-Maduro a informa ATIA riba trabaonan di e reforma fiscal di nos pais

ORANJESTAD – Diaranson ultimo Minister di Finansa, Asuntonan Economico y Cultura hunto cu su conseheronan a reuni cu ATIA Aruba pa brinda informacion riba e trabaonan cu gobierno y e departamentonan concerni pa locual ta e reforma fiscal di nos Pais. Durante e reunion aki Minister a splica riba e yudansa cu IMF a ofrece na Aruba, kico nan sugerencia preliminario ta y e mandatario a indica cu asina e rapport oficial keda cla lo comparti e informacion aki cu ATIA y otro stakeholders.

Otro topico cu a delibera riba dje ta e maneho economico y aki Minister Ruiz-Maduro a brinda un splicacion riba e trabaonan cu ta wordi haci riba e tereno economico pa nos yega na nos vision economico cual ta un economia fuerte y resiliente pa Aruba. Esaki ta dirigi riba e siguiente areanan; baha e costo di bida, crea un finansa publico solido y manehabel, stipula un maneho pa stimula comerciante, stimula un maneho di exportacion, stimula un maneho macro economico y tambe un maneho di inversion.

Durante e reunion Minister a presenta e 6 sectornan prometedor: Sector di Turismo, Economia basa riba conocemento, Agricultura, Logistica, Economia Circular y Industria creativo. A informa e miembronan di ATIA cu awor Gobierno lo bay traha riba e incentiva necesario pa por concretisa e potencial economico cu e sectornan presenta aki ta brinda. Pa esaki sigur Gobierno di su banda lo kier sigui conta cu e “input y feedback” di ATIA. Dentro di poco e mandatario lo yama un reunion cu gremio y sindicato pa asina por duna mas informacion riba e reforma fiscal y e vision economico pa nos Pais Aruba.

ATIA di su banda a pidi e mandatario tambe atencion pa e tema di compliance, esta e cumplimento cu pago di belasting door di tur compania activo den nos economia, ja cu tin hopi indicacion cu no ta tur hende ta cumpli manera debe ser y esaki ta crea un competencia inhusto cune. Banda di esaki a pidi atencion tambe pa e fenomeno di ilegalidad den e forza laboral cu tambe ta perhudicando hopi negoshi cu si ta cumpli cu tur regla. Na opinion di ATIA mester bin mas control di por ehempel Departamento di Impuesto na proyectonan grandi pa verifica si ta cumpli debidamente cu nos leynan fiscal. Puntonan cu e mandatario ta hiba pa asina discuti riba nan den seno di gobierno.

Na final, ATIA a informa Minister Ruiz-Maduro cu nan tambe lo forma parti di e mission economico di Reino pa Colombia fin di november, como muestra cu hunto nos mester sali busca e oportunidadnan pa comercio na Aruba por florece.

FINAL

26102018

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.