Ta conscientiza pueblo riba Dia Mundial di Enfermedad Mental

Minister Dangui Oduber:

 Ta conscientiza pueblo riba Dia Mundial di Enfermedad Mental

 Segun Minister di Salubridad Publico, sr. Dangui Oduber, ta su deber como Minister pa conscientiza e pueblo encuanto tur enfermedad cu ta biba den nos comunidad. Dia 10 di Oktober ta dia mundial di enfermedad mental pues lo toca e importancia di e tema aki.

 

Mitar di tur enfermedad mental ta cuminsa na e edad di 14, pero mayoria di e casonan no ta wordo detecta of trata. Encuanto di e enfermedad bao di e adolecentenan, depresion ta e tercer causante principal. Suicidio ta e di dos causante y ta causa morto bao hobennan di edad entre 15 pa 29 aña. Consumo dañino di alcohol y droga encuanto e adolescentenan ta e mayor causante, esaki hopi biaha ta conduci na conducta di riesgo manera tene relacion insigur of trece peliger den trafico ora di maneha un vehiculo. Na tur tin 20 diferente grupo grandi di enfermedadnan mental, cu tin bao di nan atrobe un gran cantidad di otro enfermedadnan mas chikito.

 

Manera ta conoci e gobierno aki no a ricibi un situacion facil, pa 8 aña e gobierno anterior a corta gasto y no a inverti den e ser humano cu consecuencia cu Aruba a keda hopi atras den psiquiatria y adiccion compara cu Corsou y Hulanda.

 

Tumando nota di tur e cifranan den e area di enfermedad mental, e gobierno actual ta sigui cumpli cu promesanan di campaña unda e ser humano ta central. E gobierno aki lo sigui mehora e servicio na nos comunidad y baha e tempo di espera cu e pacientenan ta warda pa por wordo atendi. Lo haci esaki door di busca mas profesionalnan den servicio door di entre otro pone mas fondo disponibel y tambe door di e programa di AruBig, caminda yiunan di tera cu a studia medicina den region tambe ta haya oportunidad pa traha na Aruba.

 

Minister di Turismo, Salud Publico y Deporte, sr. Dangui Oduber ta sigui traha pa mehora e calidad di bida di esnan cu ta sufri di e enfermedad mental y tambe di nan famia. Dentro di 2 luna e Minister lo mustra pueblo con e lo ehecuta su vision pa cu e maneho integral pa cu nos sistema di Psiquiatria y Adiccion.

 

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.