Minister Dangui Oduber hopi preocupa cu e situacion di hospital. “Tur cos cu por a bay robes a bay robes den e proyecto di renobacion y expansion di hospital

Minister Dangui Oduber hopi preocupa cu e situacion di hospital. “Tur cos cu por a bay robes a bay robes den e proyecto di renobacion y expansion di hospital”.

Pa loke ta trata e situacion di renobacion y expansion di hospital esaki ta un di chaos. Hopi reto tin actualmente pa e proyecto aki. Un proyecto cu a wordo cuestiona desde principio.

Tur cos cu por a bay robes den e proyecto aki a bay robes. Falta ainda 50% di periodo di construccion y ta masha preocupa pa futuro di e construccion. Pesey Gobierno di Aruba ta considerando pa stel aan un onafhankelijke projectleider. Na e momentonan aki hospital tin un projectleider cu no tabata tin e conocimento ni experiencia pa guia un proyecto cu costo di 1 biyion di florin. E projectleider aki a wordo proponi pa tuma e tarea aki door di e contratista mes.

Na momento cu e proyecto a cuminsa varios aspecto a wordo lubida. Tin un discussion andando cu gerencia di hospital kier cambia scope un biaha mas. E cambio di scope haci door di ex minister Schwengle aña pasa tabata tin un implicacion financiero cune di mas cu 80 miyon florin adiccional riba e budget cu a wordo aproba caba.

Hopi cambionan significante cu mester tuma lugar den e renobacion y expansion di Hospital manera e: sala di operacion, e Intensive Care Unit y Medium Care Unit como tambe nan equipment. Asina tambe nan a lubida e microbiology, MOB second floor built out room, y un second main equipment room, cambionan den coriente y sistema di alarma di candela.

Tabata tin dos compania cu a participa na e bid di e proyecto hospital y esaki tabata uno frances cu ta yama Bouygues y uno mericano cual ta OHL Arellano cual na final a gana e bid. E compania frances Bouygues a bid 24 miyon florin menos cu Arellano. Na e momento ey SOGA e bisa pa no wak solamente prijs pero otro aspectonan tambe cu e companianan aki ta ofrece. Un di aspectonan aki tabata “meerwerk”. E compania multinacional frances a ofrece di cubri cualkier “meerwerk” cu lo por surgi den e proyecto aki mientras cu e contratista Arellano cu ta construyendo e hospital actual a cobra 5% adelanta ariba meerwerk mirando cu eta anticipa caba cu lo tin meerwerk. Actualmente tin meerwerk di 110 miyon florin. Toch a scoge e compania cu prijs mas halto pa e proyecto di renobacion y expansion di Hospital.

Awor pais aruba ta haya su mes confronta cu e hecho cu tin un retraso enorme den e proyecto aki, tin hopi contra tiempo y tin un budget overrun di mas di 100 miyon florin. E suma aproba pa parlamento pa e proyecto di Hospital tabata 252.700.000 florin. Na e momentonan aki ya caba tin gastonan di 360.259.000 florin.

Gobierno di Aruba hunto cu AZV ta bezig pa mira e posibilidadnan pa asina por stel aan un onafhankelijke projectleider pa evita tur loke a bai robes y cuminsa cu un investigacion forensico pa nos yega na raiz di esnan cu ta culpabel y responsabel pa e budget overrun.

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.