Maluso y manipulacion di informacion por perhudica un pais!

Lider di fraccion di MEP, sr. Rocco Tjon:

Durante conferencia di prensa ayera nos a elabora riba e aspecto di manipulacion di informacion di sr. Eman.

BANCO CENTRAL y CBS

Banco Central di Aruba a indica caba cu e informacion cu sr. Eman a usa no ta di nan. E maluso aki por perhudica pais Aruba pasobra conscientemente sr. Eman ta crea incertidumbre pa loke ta nos economia. Esaki e ta haci door di usa datonan y logo di Banco Central, pero e ta pone su mesun conclusion como titulo.

Pa loke ta e rapport di CBS, colega parlamentaria tambe a trece padilanti claramente con sr. Eman a manipula e informacion. Por sigui e conferencia di prensa di sra. Christiaans-Yarzagaray riba facebook. Importante pa nota cu sra. Christiaans-Yarzagaray a fungi pa hopi aña como e director interino na CBS.

INTEGRIDAD, SCREENING Y CARTA DI EMAN

E manipulacion aki di sr. Eman nos ta considera un “integriteitsbreuk”. Awor cu sr. Eman a wordo desenmascara y argumento a caba, diripiente un fractiemedewerker di AVP a wordo manda door di sr. Eman pa cuestiona sr. Tjon su integridad. Esaki a base di un caso civil, den cual sr. Robert Candelaria (AVP) mes a declara por escrito na sr. Tjon su fabor.

Sr. Tjon a duna prensa un copia di e screening cu a wordo ehecuta na 2016 door di Veiligheids Dienst Aruba, cual tabata resorta bao mando di sr. Mike Eman. Esaki tempo el’a bay ocupa e funcion di director di KIA. Adicional sr. Tjon a duna prensa un copia di un carta cu sr. Mike Eman a manda pa sr. Tjon na aña 2014. Den e carta por lesa con sr. Mike Eman ta elogia sr. Tjon pa su logro di a gradua na FBI Academy. Un school cu bo por atende solamente si bo pasa screening di Merca, Hulanda y Aruba.

PA CONCLUI

Sr. Tjon a finaliza pa bisa cu e ta lamenta cu sr. Mike Eman den su afan pa manipula y papia su actonan bon, ta hiba un politica sushi y manipulativo.

“Mi a priminti un politica basá riba hecho, al caso y riba nivel. Esey mi ta keda para p’e”, sr.Tjon a finaliza bisando.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.