Kid$ BIZ Market

Kid$ BIZ Market”

 

ORANJESTAD – Departamento di Asuntonan Economico, Comercio y Industria/IDEA como parti di Ministerio di Finanzas, Asuntonan Economico y Cultura a organisa un proyecto educativo pa e muchanan di entre 9 te cu 13 aña. E nomber di e projecto aki yama “Kid$ BIZ Market”, y a tuma luga na Departamento di Asuntonan Economico entre 1 di oktober te cu 5 di oktober 2018.

 

Den e proyecto aki e muchanan a ricibi educacion empresarial y el a yuda e muchanan reconoce oportunidadnan comercial. E muchanan a haya informacion di ki tur un negoshi ta encera, con pa maneha un negoshi y nan a wordo stimula cu nan tambe por bira un futuro comerciante. Nan a siña con pa genera placa door di haci actividadnan comercial for di un edad hopi jong, usando nan mesun creatividad. Nan a haya e oportunidad pa siña traha un plan di un negoshi cu nan tin pensa di habri den futuro. Tambe nan a siña traha diferente snacks saludabel, traha carchi creativo, haya informacion tocante e tecnologia di 3D printing y tambe siña traha diseño creativo riba boter. Riba diaranson y diahuebs nan a logra bishita dos compania. Na ‘Amore Mio’ nan a siña traha pizza Italiano y na e fabrica di ‘Gelatissimo’ nan a experiencia e proceso con pa traha gelato. Tambe e muchanan a haya un presentacion di e 17 metanan di ‘Sustainable Development Goals (SDGs)’ pa nos dushi tera door di nos coleganan di Departamento di Asuntonan Economico. E team di ‘Futura’ a duna un tremendo presentacion tocante tecnologia y innovacion y ki tur esaki ta encera. Tambe ‘Futura’ a brinda e muchanan e oportunidad pa hunga weganan innovativo pa test e.o nan concentracion. E meta di IDEA ta pa stimula y contribui na e formacion di futuro comerciantenan pa Aruba.

 

For di 28 di februari 2018, IDEA a inicia e proyecto cu yama “Kidpreneur$ With Big Ideas” cu ta specialmente pa e muchanan cu ta bishitando e 9 ‘Traimerdianan’ na Aruba. Pa duna oportunidad na otro muchanan cu no ta bishitando ‘Traimerdia’, IDEA a dicidi di organisa un proyecto di un siman pa nan, yena cu workshop y actividadnan cu por educa, stimula y inspira nan pa nan bira un futuro comerciante.

 

E proyecto aki a dura 1 siman largo y e muchanan por a disfruta di diferente workshop y actividadnan comercial for di 8:30’or mainta te cu 12:30’or merdia.

E contenido di e workshopnan tawata lo siguiente:

  • Get Kids started as Entrepreneurs (ActionCOACH Aruba);
  • Creative Food (Sra. Clarina Geerman);
  • Develop a Business Plan (Sra. Judella Trim);
  • Bottle Makeover (Artistic Bottles Aruba);
  • 3-D Printing (Frolijk 3D);
  • Visit to ‘Amore Mio’ for Pizzamaking workshop;
  • Creative Cards (Sra. Lurainne Donata);
  • Visit to Gelato Factory (Gelatissimo);
  • Thinker Box (Futura);
  • SDGs Presentation (DEZHI)
  • Certification Award

 

 

 

Un total di 32 mucha por a participa completamente gratis den e proyecto aki. Na final di e proyecto, tur 32 participante a logra ricibi un certificado di participacion.

 

E intencion di e proyecto aki ta e.o. pa e muchanan por participa na e Kidpreneur$ Bazaar cu ta organisa pa comienso di december 2018 door di Departamento di Asuntonan Economico/IDEA pa asina nan haya e oportunidad pa bende nan producto of servicionan cu nan mes a crea.

 

IDEA ta gradici tur su partnernan y presentadornan e.o. Departamento di Asuntonan Economico, Amore Mio Pizzeria Napoletana, Gelatissimo, ActionCOACH, Artistic Bottles Aruba, Frolijk 3D, Futura, Sra. Clarina Geerman, Sra. Judella Trim y Sra. Lurainne Donata pa yuda hasi e projecto aki un realidad. Tambe IDEA ta gradici srta. Alina Kock cu a yuda voluntariamente como juffrouw pa nos muchanan y tambe na tur e coleganan di DEZHI cu a yuda haci e proyecto aki un realidad. IDEA ta gradici inmensamente tur e mayornan cu a pone nan confiansa den nos y tambe na e muchanan pa nan participacion activo den nos proyecto di Kid$ BIZ Market. Durante e siman di e proyecto, IDEA por a nota cu Aruba tin hopi talento comercial entre nos muchanan.

 

Nos di IDEA ta desea tur e muchanan hopi exito cu nan creacion di nan producto of servicio pa nos siguiente actividad cual ta e Kidpreneur$ Bazaar cu lo tuma luga comienso di december 2018.

 

Por sigui nos riba Facebook Page: @Idea-Aruba.

 

 

 

 

 

 

 

 

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.