Homber asesina ariba caminda di Tanki Leendert, esaki ta e di 5 asesinato pa 2017

Tanki Leendert: Algo pasa di 4’or y mey ta drenta un informe cu tin un persona gravemente herida, na prome instante lo a pensa cu un auto lo a alcansa un peaton, despues ta bin compronde cu ta un persona a wordo hinka y ta seriamente herida.

Cu hopi urgencia a manda polis y ambulance na e sitio. Na yegada enberdad nan a bin topa cu un cabayero, cu tabata tin varios hinka na su curpa y tabata den un situacion hopi critico.

Na e sitio, testigonan a conta cu nan a mira tres persona bringando cu e victima, nan a gritanan y ora nan kier a bira pa bin yuda e victima, nan a bin topa cu e victima bou sanger y gravemente herida. Tambe nan lo a mira un di e tresnan cu un cuchiu den su man.

Mesora personal di ambulance a cuminsa trata e victima, despues di basta rato reanimando e victima, e personal di ambulance mester a stop pa motibo cu e victima no tabata dunando señal di bida mas. Pa 6’or y 5 di mainta Dr. Texier a constata morto di e victima y fiscal Kardol a tuma e curpa den beslag.

Polis na e sitio a cera e caminda pa asina cuminsa cu e investigacionnan necesario. Poco poco famianan di e victima tabata yegando na e sitio, entrenan su kerida mama, kende a sak den otro y tabata yora inconsolabelmente, polis a pidi pa presencia di slachtofferhulp pa asisti e famia na e sitio.

Departamento technico di polis a presenta na e sitio  y cuminsa cu e investigacionnan, e caminda ta cera pa mas investigacion.

Leave a Reply

Your email address will not be published. Required fields are marked *

*