Homber a ranca boshi jabi di Pizza Hut, for di man di supervisor

Primavera: Dialuna anochi pa mas o menos 11 ‘or di anochi, polis ta wordo manda cu urgencia na un cas na Primavera pa motibo cu un persona desconoci a ranca full un boshi yabi for di un dama y e dama tabata basta altera.

Na yegada di e prome patruya, enberdad nan ta bin topa cu e dama basta spanta y nan ta bin compronde cu e dama ta un supervisor di Pizza Hut, e boshi yabi ta yabinan di Pizza Hut Sasaki. Segun e dama e auto cu e persona lo mester a sigui for di ora cu ela sali di Pizza Hut y na altura di airport ela cuminsa ta dim bright e auto di e dama, pero e dama a sigui core bay te su cas.

Ora ela yega su cas, e auto a baha e homber bisti na preto banda di e cas, e homber a cana bin den su direcion y a ranca e boshi yabi for di su man y a sali bay direccion pabou.

Algun minuut despues di e sucedido, a drenta un informacion cu banda di un cas cerca di unda e robo a tuma lugar, lo tin un homber sospechoso full na preto bisti para, mesora a manda un unidad di polis y nan a busca den e area pero no a topa cu e homber bisti na preto.

Tambe Polis a bay na Pizza Hut Sasaki pa mira si e camaranan di seguridad lo por a capta algo na momento cu e dama a sali for di Pizza Hut, si acaso e auto a sigui’e for di Pizza Hut y tambe pa mira ki auto lo por a sigui e dama.

E dama tabata hopi spanta y a pidi asistencia di slachtofferhulp pa trata cu ne.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.