Ex amiga a manda donjo bay cobra huur di apartment cerca amigo.. Cobramento a termina den pelea cu bat y donjo agredi

Diadomingo merdia polis ta wordo informa di un menasa, pelea of maltrato cu ta tumando luga den Nobelstraat den cual tin diferente persona envolvi.

Polis na e ora indica ta wordo manda na Union Caribe den Caya Ernesto Petronia relaciona cu e caso ariba menciona. Na yegada nan ta papia cu e homber JRME (45), kende ta bisa di ta e victima. Segun el a conta e Polisnan, rond di 10.50 di mainta el a bay den Nobelstraat pa busca placa cerca un persona cu e conoce como Luis (28). E persona aki pa dos luna caba mester pague un placa cu e debe. Tur cos ta mustra cu ta relaciona cu huur di apartamento di dama.

El a bay na e cas di mama di Luis pa papia riba e asunto aki. Pero Luis y su ruman homber di repente a cuminsa core su tras y a dal’e algun mokete.

Polis a bay den Nobelstraat unda cu a papia cu e mama di e rumannan, esta e señora (46), den presencia di su dos yiunan LP y GP (22). E señora a bisa cu e homber JRME a bin grita na su porta di cas “DOnde esta Luis”, y cu e lo mate. E homber despues a habri baul di su auto y a saca un bat di baseball y a keda menasa nan cu morto. GL y LP ambos di nan banda a bisa cu nan a tende un hende ta grita pafo y a bay wak kico ta pasando. Nan a mira JRME cu e bat den su man y cu e tabata menasa nan mama. Nan  bisa cu esaki ta algo cu nan no por permiti y cu p’esey nan a core tras di dje y a dal’e.

LP a declara tambe cu su ex amiga JA (31) ta biba na Madiki. E ta esun cu a trece e donjo JRME pa pidie placa. Segun LP, su nomber no ta aparece riba e acuerdo di huur di e apartamento na Madiki. Ta berdad cu tin biaha e ta bay cerca JA pero nunca e ta keda drumi eynan.

E bisiña tabata testigo di e menasa cu a wordo expresa door di JRME. Polis a constata tambe cu JRME tabatin un kap na su frente y un corta na su wenkbrauw robes. A bise bay dokter pa haya un rapport y ambos banda a wordo manda Recherche pa entrega keho.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.