E 481 kamber cu Benny Sevinger ta referi constantemente riba dje, ta kambernan di Concorde Hotel otorga na 1975

Parlamentaria di POR, drs. Marisol Lopez-Tromp:

E 481 kamber cu Benny Sevinger ta referi constantemente riba dje, ta kambernan di Concorde Hotel otorga na 1975

Parlamentaria di Fraccion di POR por a tuma nota cu ex – minister Benny Sevinger a dedica henter siman pasa riba e tema di kambernan di hotel y muy en particular riba drs. Marisol Lopez-Tromp.

E parlamentaria di POR a bisa enfaticamente cu cada persona mester carga su responsabilidad pa su temporada di gobernacion, manera cu e ta haci cu su parti. “Loke mi por a firma mi ta para responsabel p’e y ta proyectonan cu a keda realiza, pero pa e ultimo 8 añanan tin un cantidad di 7 mil kambernan extra firma door di Benny Sevinger”.

Dos punto cu Benny Sevinger a presenta den su declaracionnan y cu Marisol Lopez-Tromp ta refuta enfaticamente ta cu supuestamente Lopez-Tromp lo a firma pa duna e hotel e terenonan den e wetlands, cual ta un area protegi pa nos ley di zonificacion cu a bin na vigor desde 2008.

“Esaki absolutamente no ta berdad. Loke tabata tin e tempo ey tabata cu esnan cu ta traha na hotel tabaa ttin mester di area pa parkeer y debi cu no tabata tin, a pidi un lugar temporal, sea den huur of cu nan por usa. E tempo ey berdad gobierno a propone a base di conseho di departamentonan y conseheronan pa laganan por usa temporalmente e area banda di The Mill, pero na ningun momento e area aki a wordo otorga na ningun hotelero”. E uso di e area aki no a bay door tampoco debi cu e trahadornan no tabata considera e area esun di mas mihor door cu nan mester a cana den tur e tereno di tera y piedra ey pa yega nan trabao.

Sra. Marisol a expresa cu esun cu no ta kere, lo por bay check esaki atraves di Departamento di Kadaster, inclusive e propio ex – minister Benny Sevinger, kende ta parce no a haci su huiswerk y ta keriendo cu e tereno aki a wordo otorga.

E otro punto cu drs. Marisol Lopez-Tromp a aclarea ta e punto di un cantidad di 481 kamber cu Lopez-Tromp lo a otorga, segun un decreto di 2006. Contrario na e declaracionnan di Sevinger, e cantidad di kambernan aki ya caba tabata un hotel na momento cu sra. Marisol Lopez-Tromp a bira minister. E kambernan aki ta trata di Concorde Hotel cu a habri den añanan 70 y tabata construi caba. Es decir, no ta Lopez-Tromp a bin cu e hotel aki. E hotel aki for di aña 1975 cu tabata destina pa 481 kamber y a bira Concorde, nunca a cambia, semper a keda e 481 kamber te cu ultimo.

Bestuurscollege a aproba e cantidad di kambernan pa e hotel aki na 1975 y Concorde Hotel a habri su portanan na December 1977.

Sra. Marisol ta indica cu por ta Benny Sevinger ta pensa cu pueblo ta bobo y cu no ta busca pa sa, pero ta trata di algo cu ta existi caba y cu ta data for di añanan 70 ora cu Marisol Lopez-Tromp tabata mucha ainda.

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.