Drama den lagoen di Bucuti ora boto a bolter y un señora a perde su bida y un baby cu tawata teme pa su bida

Bucuti: Diamars riba dia di obrero, algo prome cu 10’or di mainta, polis ta haya un informacion cu un boto A2333, cu 19 hende abordo, lo a bolter pariba di Renaissance Island, mesora a manda polis na e sitio.

Cu ayudo di e boto di Renaissance Beach Resort y algun otro boto particular mas, hopi liher por a rescata esnan cu tabata abordo di e boto cu a bolter y a hibanan na un pier net pariba di Bucuti Yacht Club, entrenan tabata tin varios mucha y un baby. Durante cu e boto a bolter den ansha algun lo a gara na e motor di boto cayente y lo a kima. Na momento cu nan a yega na e pier e baby su situacion tabata critico, tambe un dama cual ta casa di e capitan a hoga, e no tabata reaciona, a trata na dune CPR pero esaki tabata envano, e dama ya a fayece, Dokter Texier a presenta na e sitio y a constata morto di e dama.

Varios herido a wordo trata na e sitio y otro a wordo transporta pa hospital, despues cu e baby a yega hospital, a drenta informacion cu ela cuminsa reaciona y a keda interna. Un otro dama cu tambe tabata herida a wordo interna na hospital.

Un dia di fiesta, cu mester tabata un dia alegre pa un famia, cu a bay dal un paseo riba un boto a caba asina liher y tristo. Na yegada por a mira e tristesa riba cara di tur esnan cu tabata abordo, contento cu e tragedia a pasa, pero hopi tristo pa motibo cu un di nan miembro di famia no tey mas cu nan.

Un danki sigur mester bay na e botonan cu hopi liher a sali yuda rescata e famia aki y muy especialmente e boto di Renaissance Beach Resort, cu su capitan a sa di a sali mesora pa yuda e famia.

E dama cu a fayece tabata casa cu e capitan di e boto. Condolencia y hopi forsa na famia di e fayecido.

 

Leave a Reply

Your email address will not be published. Required fields are marked *

*