Dos persona seriamente herida den accidente frontal na Paradera

Un accidente hopi serio a sosode caminda dos auto a dal frontal.
Ta trata di un Toyota Yaris y un Subaro.

Na e sitio nos a papia cu e chauffeur di e Subaro y ela conta nos cu e tawata bayendo direccion rotonde Paradera y e Toyota Yaris direccion Piedra Plat.

Ela sigi conta nos cu e yegando e crusada pariba di Great Rich e Yaris cu velocidad halto a bay trata na drenta e caya pariba di e restaurant, pero no ta logra y ta dal fronta contra e Subaro color cora.

E dos ocupantenan di e Yaris ta keda seriamente herida. Na yegada nos por a wak e chauffeur pafo di e auto ariba acera drumi y cu basta sla y sanger na curpa y tawata keha di dolor. E pareha den e Yaris ainda tawata tin shirt di Carnaval bisti, pues esaki por ta un indicacion cu nan lo tawata bayendo cas y cansancio lo por a hunga un rol.

E dama pasahero a keda geklem den e auto, den e posicion hopi fastioso. Unidad di brandweer mes ora su personal a bay den accion y ta corta parti di e auto, pa asina saca e dama.

Na e sitio a presenta tres ambulance, mirando cu tin tres persona envolvi, pues dos den e Yaris y e chauffeur di e Subaro, cu no a sali illeso for di e desgracia.

Cu urgencia e dos ambulancenan a sali direccion hospitaal cu e ocupantenan di e Yaris.
Specialista di trafico a wordo pidi tambe na e sitio.

E dama su situacion ta critico.

One comment

  1. E declaracion di e cabayero chauffeur di e subaru ta contradictorio pa dos motivo:
    1. E chauffeur di e yaris tabata bai bira na su man robes, con bo por coi un bocht di 90 grao cu velocidad halto?
    2. Si e Yaris tabata bin cu velocidad halto e lo a dal y sigui para mas pariba, pero por observa cu e subaru a dal sigui bin abou y pusha e yaris back algun meter for di e caminda cu e tabata biniendo.

    Tur cos ta mustra cu e Subaru tabata bin cu velocidad halto, esaki no ta kita afo pa lei cu e Yaris a lora na su man robes, pero por evita tipo di accident nan aki si core drechi y no manera cu no tin manjan.

Leave a Reply

Your email address will not be published. Required fields are marked *

*