Dos hoben haya cu varios botter conteniendo marihuana den auto, ta keda deteni durante un control

Piedra Plat: Diabierna algo prome cu 5’or di atardi, un poco pazuid di Bright Bakery un patruya atento ta mira un Hyundai Getz Shinishi cu dos hoben den dje, nan tabata no tabata tin seatbelt bisti, e dos hobennan den e auto tabata actuando sospechoso.

Ora e chauffeur di e Hyundai Getz a mira e patruya di polis, di biaha ela bay staciona riba e parkeerplaats banda di Bright Bakery. E patruya a no confia esaki y a bira bin bek, para net nan dilanti pa haci un control riba e auto.

E hoben sinta na banda mesora a sali for di e auto y a core bay direccion zuid. Den e auto, e agentenan policial a bin topa cu varios botter di glas cu marihuana den nan.

E chauffeur di e Hyundai Getz a keda deteni y transporta pa warda di polis. E botternan cu ta contene marihuana, skernan, e cellularnan cu tabata tin den e auto y e auto tambe a keda confisca. Takelwagen di polis a transporta e auto pa warda di polis.

Despues cu polis a termina pabou di Bright Bakery, nan a cuminsa cu un buskeda den e area caminda e pasahero a core bay. Na un skina di caya un poco pazuid di Bright Bakery, e polisnan a bin topa cu e hoben para banda di un palo di lus. E hoben aki di 16 aña tambe a keda deteni. Na momento cu ela core pa polis e tabata tin un tas preto cune y ora cu polis a topa cune, e tabata sin e tas.

Polis a transporta e hoben aki tambe pa warda y a cuminsa cu un buskeda den e area pa e tas preto pa mira kiko e lo por tabata tin aden, no ta conoci si e agentenan a logra topa cu e tas. Un habitanten un rato prome a mira e hoben cu e tas rond di su nek, muy probablemente lo por tin algo den e tas, cu e hoben aki no kier pa polis hay’e cune.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.