DIA TRISTO Y SCUR DEN E PAGINA DI HISTORIA DI ISLA ARUBA

Hopi emociona y tristo mi a wak con Parlamento di Aruba cu apoyo di algun Ministro a aproba e amienda.  Esey kiermen cu di awor en adelante parehanan di mesun sexo por registra legalmente den un union oficial na censo.

Pretexto Fofo
A drai e amienda tur manera pa finalmente pasé toch bisando cu a yega na un  consensus basa riba decision di Corte Europeo pa cu e situacion di Italia y basa riba e echo cu na Aruba lo tin “supuesto” desigualdad…

A usa e dos pretextonan aki pa calma consenshi sabiendo cu ningun di dos ta valido pa hustifica un decision asina crusial cu ta bay hunga un papel asina importante den e bida moral y social di un Isla chikito manera Aruba.

E realidad
Hamas y nunca den historia di Aruba tabata tin y no tin prueba cu tin practica di desigualdad den e aspecto aki.  Tur tur loke un pareha sea heterosexual of homosexual kier logra pa cu asuntonan di propiedad y/of repartimento di bienes por wordo regla sin ningun problema pa medio di leynan existente sin necesidad di un amienda y mucho menos cambio di ley…

Parlamentario y MInisternan na fabor di esaki mester compronde cu na momento cu a aproba e amienda no ta un problema di derecho riba bienes a wordo regla y tampoco un problema di desigualdad.  Ningun di e dos cosnan ey ta existi.

Loke cu a aproba ta un matrimonio via porta di cushina.  Ta esey e ta.  Tur pareha cu registra di awor en adelante ta hanja tur tur derecho mescos cu un matrimonio, te asta yiu nan por adopta..

Nos tin un pregunta pa e Parlamentario y/of Ministernan cu a aproba e amienda.  Si manjan un di nos yiunan puntra nos si hende homber mag di tene relacion sexual cu otro hende homber legalmente kiko nos lo bisa nan?  Y ken ta esnan cu aproba pa legalisa esaki?

Tur tempo nos a biba riba E Isla aki y a acepta, tolera y biba cu e echo cu tin ciudadanonan cu tin otro preferencianan sexual.  Ta un pais democratico y segun e sistema cada hende tin derecho di tuma su mes decision.  Nunca cu mi ta corda riba E Isla aki a descrimina y mucho menos trata niun hende di desigual.   Semper a respeta y a biba cu e echo.

Loke cu nos ta para pe ta cu no por no por permiti pa pone ley di Dios y di naturalesa cu ta canando pa miles di anjanan un banda pa introduci ley di hende cu ya nos a mira ki resultado esey a duna caba na unda nan a wordo practica.

Coreccion
Amor den beibel ta un amor cu ta coregi y un amor cu ta spierta.  Beibel ta bisa cu Dios ta “suta” esun cu E ta stima.  Amor den beibel ta ora mi mira esun cu mi ta stima ta bay den direccion di un peliger, mi ta spierte bise pa no bay paso eynan tin peliger.  Amor  biblico no ta un capa pa permiti hende haci loke cu nan kier.

2 / 3
Aprobacion di e amienda concerni no tin nada nada di haci cu amor di Dios manera cu e ta den Santa Scrituranan.  Aprobacion di e amienda ta simple y yanamente lisencia legal pa practica libertinahe…  Den bista di Dios, esey e ta.

Nos Parlamento ta bay den historia como esunnan cu a otorga e lisencia aki, na mi parecer mas pa rasonnan politico y no pensando riba moral di nos Isla y di nos yiunan.  Dios ta yama esaki abominacion, (Lv.18:22).  E problema no ta cu hende shonnan, e ta un problema cu Dios Tata Todopoderoso y Dios no ta laga tene di bofon.  Loke cu nos  planta ta esey mes nos ta cosecha, (Gal. 6:7).

Spiertamento
Nos posicion ta di e spiertado den Eze. 33:8-9.  Dios ta manda nos spierta e pueblo y habri nos boca y bisa cu nos ta di Cristo.  Nos tur ta pecador, pero e lucha pa biba un bida cu ta agrada Dios ta un lucha genuino y vale la pena pa hiba, no importando kiko hende papia.  Te awe ainda nan ta papia malo di Cristo nos Maestro y Salvador, mescos nan ta papia di nos.  Miho lucha pa agrada Dios cu complace hende y keda malo cu Dios.

Dia Scur
Dia 8 di September 2016 ta un dia scur den nos historia.  E dia aki ta asina scur cu mi ta kere cu den historia di Aruba nos lo bay papia di e Aruba prome cu e Amienda Consensus y e Aruba despues di e Amienda Consensus.  Ami ta kere cu hamas y nunca nos grandinan por a pensa cu riba E Isla aki algo asina aki lo wordo aproba.

Con nos ta bay trata y coregi un mucha ora cu e hanja e trauma di wak su tata den relacion sexual cu un otro homber.  Y pio ora cu djies aki mester bay cuinsa sinja na skol  con homber ta tene relacion cu homber y mohe cu mohe.  E ta legal toch??  E danjo sicologico, spiritual, emocional lo ta grandi.  En ves di drecha cos nos ta haciendo mas danjo na nos sociedad.

Hulanda e pais na unda “alles mag”.  Ata nan mal pega cu e resultado.  Esey ta loke nos kier na Aruba?? Aruba ta un Isla cu atraves di historia por a duna les na Hulanda y na hopi pais di mundo con ta casa, con ta forma famia, con ta lanta yiu y con ta biba.  Pero nos problema ta cu tur cos cu bin di afo ta miho cu loke nos tin, anto nos cosnan ta tabu, nan ta ouderwets y nan ta malo, y lamentablemente nos ta keto bay cambiando  cosnan sano cu a duna hopi bon resultado pa cosnan destina na fracasa paso nan no a duna bon resultado niun caminda.

Aruba prepara awo pa mas famia kibra.  Awo multitud lo bay sali foi closet, foi ijskast for di tur caminda.  Esnan cu no ta logra cu hende homber awo ta bay purba cu hende mohe y viceversa, un bruhamento formal.  Mas disaster y decadencia pa famia.  Prepara pa e avalancha di hobennan cu lo lanta y ki ora nan sinti un tiki problema hormonal ta cuinsa sinti cu nan ta den e curpa robes y ta bay registra pa biba den cu partner di mesun sexo…

Spera mas pushamento di LGBT manera ta sosodiendo na hopi parti di mundo caba cu nan exigi cu ensenansa moral na skolnan mester cambia y acomoda na e leynan nobo cu ta wordo aproba.  Parlamento a bisa “A”?  Prepara pa bisa “B” tambe… Ata e ehempel di Teoria di Genero caba cu ta cabando cu tur moralidad na skolnan na diferente parti di mundo.

3 / 3
Modus Operandi
Conocniendo e modus operandi di Dios, E Dios Berdadero cu ta stima, stima, stima y tolera, tolera, tolera, y tolera y duna second, third, fourth y fifth chance pero cu e dia ta yega cu E ta hinca man y mustra ken E ta, y pidi nos cuenta pa nos cosnan cu nos ta haci.  Bao ningun sircustancia e pica lo pasa desapercibi.  E ta stima nos pecador pero ta aborese pica.

Nos Isla tin asina tanto cosnan robes caba cu nos a importa y cu ta dunando mal resultado y esaki a bin manera e cherry riba e bolo, anto pa colmo cu derecho legal aproba pa Parlamento.

Conociendo e Dios di Beibel, mi tin temor di djE cu prome cu anja caba nos ta bay sinti Su man duru riba nos.

Sugerencia
Ban no festeha triunfo di pica.  Ban bira back for di nos mal camindanan y busca Dios su cara pa E sigui derama su bendicion riba nos dushi Aruba.   Mi ta pidi tur e 700  ciudadano preocupa cu a marcha cu nos y tur tur hende, incluyendo tur homosexual pa ban mas bien declara un dia di duelo, ajuno y oracion y penitencia y pidi Dios pordon pa tanto cos cu nos ta permiti y pidi’E pa spaar Aruba.

Dios spaar Aruba

Den Nomber di ciudadanonan preocupa

Jose Sophia

3 comments

  1. 3 pa 4 luna pasa a sosode un atentado na un discoteque na Florida, USA. E disco en cuestion tabata LGBT, varios HENDE a fayece. Jose Sophia ta di acuerdo cu esaki?

  2. Esaki ta na Sr. Jose Sophia,
    Ta asina cu ami siendo gay cu a nace y bai scol na Aruba y a biba henter mi bida aki por bisa bo cu si tin discrimination contra hende gay.
    Cu nunca porta no ta sali padilanti pero tei, nunca a pidi derecho pa cas den iglesia pero pa tin meson derecho cu un pareha heterosexsual.
    Dia pa dia e grupo di LGBT na Aruba ta creciendo y corda cu nos tambe ta hende cu ta busca seguridad y cu tin derecho di forma un hogar.
    Ami no ta wak e malo di un perona gay adopta un mucha y duna esaki un hogar, amor, respet y disiplina cos cu hopi mucha den un famia heterosexsual tin hopi biaha no ta hanja pa un motibo of otro.
    Un pareha sea heterosexsual of homosexsual por duna e mesun amor na un mucha, pasobra na final no ta majornan cu ta dicidi kende nan jui ta bira.
    Un major ta duna su jui e amor, guia y education necesario pa e por tuma su mesun decicion den bida.
    Ami a traha varios lugar na Aruba y bai scol aki a wordu descrimina pa ser ken mi ta, abo no por papia pa algo cu bo no sa y nunca a pasa den.
    Mi ta spera cu e ley aki lo trece cune mas ley nan cu ta benificia LGBT.

  3. Evelyn mester tuma su retiro, e dos payasonan tambe, sino, full nos famia ta hala leu di MEP

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.