Dama ta start su auto prome cu ela subi su auto, e auto ta bay atras ranka e dama bay cune

Avenida Milo Croes – Diasabra anochi 9’or pasa, polis a wordo notifica di un accidente cu hende herida altura di Price Smart.

Mes ora varios unidad policial a sali direccion pa unda e accidente a sosode.
Na yegada otro banda di Price Smart nan ta topa un BYD shinishi, den e porta di chauffeur un señora benta abou.
A resulta cu e señora aki a caba di traha na Price Smart y a crusa caminda bay na su auto.
Momento cu ela habri e porta y start e auto sin mishi cu nada, e auto a ranca bay patras lastrando e señora.
E momento eynan e señora a cuminsa grita pa auxilio, un hoben empleado cu tambe a caba di traha a mira kiko ta pasando.
Mes ora e colega a core crusando e caminda y bula na stuur pa stop e BYD, cu a bay den reverse rancando e señora.
Durante e incidente aki, e BYD a subi un piso y bay press un tiki contra un otro auto di un colega.
Personal di ambulance a yega y mes ora a bay atende e señora, y despues di un rato a pone e señora den ambulance y sali direccion Hospitaal.
Coleganan di e señora a pasa den un susto di mira loke tawata pasando, y e gritonan di auxilio cu nan tawata scucha.
Esnan na e sitio y tambe coleganan di e señora a haya loke a sosode basta straño.

Leave a Reply

Your email address will not be published. Required fields are marked *

*