Corte a laga homber acusa di atraco liber

Ta parce cu e trabou cu Polis a haci den e caso di atraco cometi riba un luga cu ta manda placa pa exterior, banda di Postkantoor, no tabata completo. Esaki ta motibo tambe cu no a keda Corte nada otro cu declara e di dos detenido den e caso aki liber di e acusacion contra dje.

Ta trata di un atraco cu a wordo cometi aña pasa na luna di juni, unda dos homber a drenta e oficina cu arma di candela den man y a bay cu cellular y 7500 florin. E prome sospechoso a wordo deteni y condena caba na inicio di aña. Despues di esaki a detene e supuesto di dos atracado basa riba tip ricibi. Pero awor ta parce cu e trabou di Polis no tabata complete.

E homber cu a presenta dilanti Corte recientemente ta Luis Valencia y Hues na momento di lesa e sentencia a bisa cu ora e testigo a reconoce e sospechoso via di diferente potret cu a wordo mustra na dje, no a duna e prueba convincente di su envolvimento den e caso di atraco aki.

E Polisnan no a describi den nan relato con e testigo a reconoce e sospechoso como un di e atracadonan. P’esey e reconocimento via di potret no ta suficiente pa prueba convincente.

Den e caso aki Ministerio Publico a pidi un castigo di 5 aña, kitando e tempo cu el a pasa cera caba.

Den e atraco cometi riba e luga di transferencia di placa a bay cu cellular Aple Iphone 7, un cellular Samsung y un suma di placa.

Hues a bisa a base di investigacion haci durante tratamento di e caso den Corte no a keda convenci cu e acusado a comete e delito.

Denuncia a wordo haci dia 16 di juni, 2017. E testigo a wordo scucha dia prome di maart, 2018 y a wordo mustra diferente potret, unda el a reconoce e sospechoso como un di e atracadonan, na su color di cuero, nanishi y wowonan. El a bisa cu e sospechoso ta esun cu a sinta su dilanti na yegada y a saca un arma ora cu e tabata sinta.

Durante tratamento di e caso dia 21 di September ultimo , scucha como testigo el a wordo confronta cu e sospechoso. E foto cu el a indica tabata esun cu mas ta parce e atracado, el a declara. Tambe el a bisa Polis cu e kier mira e sospechoso personalmente pasobra e lo reconoce 100%. Te den corte el a wordo confronta cu e sospechoso. El a para hopi cerca di e sospechoso y a wake den su cara. El a studia e altura di e sospechoso, haciendo un comparacion di e diferencia den e altura di dje cu e sospechoso. Y el a bisa cu e no ta reconoce como un di e atracadonan y a bisa cu e atracado ta mas cortico cu e sospechoso den Corte. E sospechoso tabata para su tras, durante e atraco, y e tabata sinti e rosea di e atracado patras di su cabes.

Corte a conclui cu e confrontacion via potret no ta prueba convincente di envolvimento di e sospechoso. Y e Polisnan no a describi con el a reconoce e sospechoso , y p’esey ta declar’e liber di e acusacion.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.