Cinco personanan perdi a wordo localisa na un boca pariba di Andicuri, den e area di Noordkaap

Diabierna den careda di 10’or di mainta un tourguide atento di ABC Tours, durante un island tour cu turista riba UTV, ta bin topa cu e van cu e 5 personanan di edad den dje. E van tabata para na un boca yama pa turista Blackstone Beach, esaki ta na e area pariba di Andicuri y pabou di Daimari.

E chauffeur kende lo ta un pastoor di un iglesia, Diahuebs atardi a busca e 4 personanan aki, na un cas di anciano “Fundacion Paraiso de Rosa”, esaki ta algo cu e chauffeur sa haci caba cu e ancianonan. E ta busca nan cu su Dogde Caravan y ta hiba nan bay keiro den naturalesa y na e parti panort di Aruba.

Diahuebs algo a bay completamente robes cu e trip di e tres damanan di edad, un homber di edad y e chauffeur. E chauffeur a lo a perde caminda, durante cu e tabata keiro  cu nan den e area di Noordkaap, segun e chauffeur a conta, ela drenta un valle cerca di costa y no por a sali. Nan a pasa henter anochi den e valle bandona. Segun e chauffeur  ela keda calmo pa no spanta e otro hendenan, ela sigui conta, cu e van a keda pega den un buraco den e valle y pa colmo den e area aki no tin señal pa por yama telefon pa pidi ayudo.Awe mainta e chauffeur a yena e buraco cu piedra y asina a traha un caminda pa nan por a sali for di e valle aki y a bay para na e boca pabou di e valle. E auto tabata tin flat tire y no por a sigui core. E boca unda nan a bay para, ta un boca cu leu a leu sa ta riba e ruta di toursnan di UTV y cabay cu ta pasa bay Parke Nacional Arikok of ta sali for di Parke pasa eynan y sigui bay, e area aki ta hopi bandona.

Diabierna den careda di 10’or e tour guide di ABC tours riba un island tour cu UTV, a bin topa cu e van, na prome instante e tourguide a spanta y a pensa cu lo ta  trata di personanan ilegal cu a subi tera, pero hopi liher a ripara cu ta trata di hendenan grandi sinta den un van.

Asina aki polis por a localisa e personanan cu tabata perdi y cu desesperadamente tabata wordo busca, ta trata di hende grandi y cu muy probablemente lo mester di nan medicamentonan. Ta for di oranan di atardi nan a sali bay keiro y nan tin tanto ora sin bebe, sin come, sin remedi etc esey tabata e precupacion grandi cu nan por deshydrata, of sali for di e van cana cay, desgracia nan curpa.Na yegada e agentenan policial a trece awa pa e personanan aki. Personal di ambulance a wordo treci cu pickup di Parke Nacional Arikok pa haci un control medico cu e 5 personan nan. Boluntarionan di Rode Kruis y tambe slachtofferhulp a bay na e sitio.

Despues cu personal di ambulance a haci un control medico cu e personanan aki, Un jeep di ABC Tours a transporta nan for di e sitio.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.