Cas bandona den bocht di Seroe Patrishi ta pega candela su so y ta kima por completo

Seroe Patrishi: Diadomingo algo prome cu 2’or di marduga, ta drenta un informe cu den e bocht di Seroe Patrishi tin un cas na candela, mesora ta manda un patruya di polis na e sitio.

Na yegada polis ta topa enberdad cu e cas bandona den e bocht di Seroe Patrishi completamente na candela. Mesora nan ta pidi pa presencia di brandweer cu hopi urgencia, paso na prome instante polis a wordo notifica cu lo tin un choller cu sa drumi eyden, pero e choller pa casualidad tabata na Dakota.

Dos unidad di Brandweer a bay na e sitio y hopi liher a logra domina y paga e candela.

E motibo di e candela ta desconoci, no por ta trata di kortsluiting paso e cas no tin coriente, probablemente elo por ta intencionalmente cendi.

Na e sitio un persona a comenta algo un poco straño, cu e ta pensa cu e cas ta net riba e tereno unda e caminda nobo mester pasa y aparentemente esnan cu ta doño no lo kier a bende e tereno.

Loke enberdad ta hopi straño ta cu pa e proyecto di e caminda a rosa y a habri tur e mondi rond, pero niun dia a mishi cu e cas, si acaso nan a cumpra e cas caba, ta den un rato nan lo por a bente abou cu un tractor. Esey ta un comentario di un cuidadano na e sitio cu a hala nos atencion, pero no ta confirma.

Kiko ta e motibo tras di e candela, con ela pega candela y ken lo por a cende no ta conoci. Despues di un investigacion, ta brandweer lo por duna mas claridad riba di esaki.

Leave a Reply

Your email address will not be published. Required fields are marked *

*