Candela ariba boto, ta causa cu dos local ta ricibi kemaduran di prome y tercer grado

Oranjestad – Diamars den oranan di mainta informacion a drenta cu ariba lama pazuid di Aruba, durante un candela dos persona lo a kima.
Informacion no oficial a indica cu e boto aki lo a sali for di Aruba, rumbo Venezuela.

Ariba lama dado momento lo a bay pasa gasolin pa e boto y aki nan algo a bay robes.
Boto den cercania a wak diripiente vlamnan grandi.
Den un fraccion di seconde, e candela a sink e boto.

Dos persona local abordo a bula na awa, pero ya un di nan di edad a ricibi kemaduranan serio di tercer grado, cu ta kemadura hopi grave. Aparentemente parti ariba di e meneer di edad, lo a ta caminda cu e candela haci mas daño, esta cara, torso y mannan.
E otro persona cu ta mas jong a haya kemadura, pero menos serio.

Un boto cerca cu a wak tur cos a rescata nan y trecenan tera. Eynan ambulancenan a transporta ambos pa hospitaal, caminda un team special tawata wardanan.

Segun nos por a compronde, personanan cu kemaduranan asina serio lo mester wordo manda den exterior cu urgencia, mirando cu e chance pa haya infeccionnan ta sumamente grandi.

Leave a Reply

Your email address will not be published. Required fields are marked *

*