Boto di polis ta saca curpa di un dama for di lama pariba di Wariruri

Bushiribana: Diadomingo mainta algo pasa di 10’or y mey, Polis, brandweer y ambulance ta bay na Boca Mahos pa motibo cu algun persona lo a mira un curpa di un dama ta drief.

Na yegada enberdad nan ta mira un curpa ta drief riba un distancia di mas o menos 25 meter for di costa. Mesora ta pidi pa boto di polis BP-2 pa bay direccion di Bushiribana pa asina por saka e curpa for di lama.

Despues di un rato ta drenta un informe cu probablemente e curpa aki lo por ta di un dama cu ta perdi. E dama aki lo a sali for di su cas pa mas o menos 6’or di mainta bay cana, ela sali sin su tas y sin su cellular y no a regresa su cas mas. E dama aki lo ta sufri di despression y tabata bou tratamento pa esaki. Familiarnan y conocirnan di e dama mesora a bay na boca mahos pa mira si por ta trata di nan ser keri.

E lama tabata hopi bruto, cu hopi coriente, esaki tabata manda e curpa hopi liher direccion pabou. Pa mas o menos 1’or di merdia e boto di polis a yega cerca pero no por a saca e curpa debi na e situacion di e lama hopi bruto. Un boto di Kustwacht a bay na e sitio y net pariba di Wariruri, un poco mas pafo, e boto di polis, cu ayudo di un di e botonan di Kustwacht, a logra saca e curpa for di awa y a hibe na Waf di Oranjestad.

Segun un familiar, e dama aki siman pasa a pidi dokter ayudo, paso e no tabata por mas cu e depression cu e ta sufri di dje. Ela pidinan pa un afspraak mas liher cu ta posibel cu un psichiater, pero e afspraak mas cerca cu e lo por a haya tabata te dia 22 di november, lamentabelmente e malesa aki a caba cune prome cu e por a wordo atendi. Ta ki dia nos cuminsa siña cu depression ta un malesa hopi peligroso y mester e debido atencion y no por wordo neglisha.

Un diadomingo cu a habri tristo pa e famia aki, e dama aki ta laga su casa y yiunan den un tristesa hopi grandi.

Update, vocero policial ta duna identidad di e dama den lama.

14.40 Dokter Texier a constata morto di Mareline Vrolijk Naci na Merca di 5 di september 1959!

Leave a Reply

Your email address will not be published. Required fields are marked *

*