Baby haya den pampers laat ariba caya, un cacho tawata compañe

Monserat: Diamars algo pasa di 10’or di anochi, un pareha pasando dilanti di He Supermarket na Monserat ta nota un baby na pampers, cu su bais di tres wiel. Esaki mesora a hala atencion di e pareha, un cacho tabata compaña e mucha y no a hala for di su banda niun rato. Mesora e pareha cu no conoce e mucha a dicidi di wanta e mucha pa e no subi caminda y a yama polis.

Na yegada polis enberdad ta topa cu e mucha cu su bais y e cacho cu tabata compaña e mucha. E pareha a splica polis con nan a bin topa e mucha y mirando cu na e momento ey niun hende no tabata sa ken e mucha chikito aki ta, polis a opta di bay cu e criatura aki warda pa asina saca afo ta ken por ta su mayornan.

Hopi liher polis a logra haya contacto cu e mayornan y nan a keda di bin buska nan yiu na Warda di Polis.

E criatura ta naci na December 2015, pues no tabata tin ni dos aña ainda. Danki na e pareha cu a bati alarma y e cacho cu a compaña e mucha, e mucha por a regresa su cas sano y salvo.

Den e caso aki no por husga niun persona paso muchanan chikito ta actua hopi liher y pa un descuido nan ta sali bay pafo y por subi caminda, pesey adultonan no por tin suficiente wowo pa mira pa muchanan chikito, pesey semper ta bon pa mantene portanan di cas y di cura bon cera, cu nan no por habri’e y asina evita e chens pa por pasa algo mas peor.

Den e caso di Monserat, pa un of otro motibo e mucha lo a sali for di cas. NO ta conoci cuanto rato e criatura tabata riba caya, tampoco si e mucha tabata cu su mayornan of cu un otro persona na momento cu ela huy for di cas.E cacho preto cu blanco a keda henter ora banda di e mucha, lo ta pa cuid’e, pa niun cacho of otro bestia por haci’e un daño.

Un cos ta sigur cu e criatura aki su Angel Guardian tabata cune y loke ta mas importante den e caso aki ta cu e tabata tin un final felis.

Leave a Reply

Your email address will not be published. Required fields are marked *

*