Gobièrnu di Korsou lo mester paga doñonan di outo ku stür na man drechi pa por saka nan for di sirkulashon

Otronan ta kere den un futuro serkano, gobièrnu lo ke bai prohibí importashon di e vehíkulonan aki. Tin ku a bai dje leu di bisa ku e maneho nobo ku minister konserní ke bini kuné,  ta benefisiá sierto komersiantenan lokal bendedó di outo. Sinembargo, nos ke para un ratu ketu na e posibilidat di gobièrnu, pa por saka e vehíkulonan aki for di sirkulashon. Nos ke kuminsá enfatisá ku un di e prinsipionan di nos estado di derechi, ta esun di siguridat hurídiko. Esaki ta nifiká ku e maneho di gobièrnu mester ta unu kla i konsistente di manera ku e suidadano for di adelantá, sa kiko e mester atené su mes na dje.

Mester bisa ku gobièrnu bèrdat tin e libertat pa ora e haña ta bon, e bini ku maneho nobo òf adaptá su maneho na benefisio di mayoria di e pueblo. Sinembargo, e prinsipio di seguridat hurídiko ta trese kuné, ku gobièrnu no por apliká un maneho nobo ku forsa retroaktivo. Esaki ta nifiká konkretamente, ku si gobièrnu ke adaptá òf bini ku un maneho nobo pa ku outonan stürwil kontrali, difísilmente e lo por apliká esaki riba esnan ku tin un di e outonan aki kaba. Sinembargo, si un investigashon sientífiko mustra ku di bèrdat e tipo di vehíkulonan aki ta mas enbolbí den aksidentenan di tráfiko ku vehíkulonan ku stür na man robes, gobièrnu lo por bin ku un dekreto pa prohibí importashonnan di e vehíkulonan aki i te asta saka esnan ku t’ei kaba for di sirkulashon.

Mester bisa si ku kua sea e maneho ta ku gobièrnu lo ke bini kuné, den práktika esaki siguramente lo bai ser husga pa un wes. Pero mirando ku no ta permití pa un wes husga kontenido di e maneho di gobièrnu, probablemente e lo stipulá ku por saka e outonan aki for di sirkulashon basta gobièrnu paga un montante di daño i perhuisio na e doño. Pa loke ta trata un maneho den kuadro di prohibishon di importashon di e vehíkulonan aki, gobièrnu tin mas libertat pa ku esaki. Den a kaso ei polítika ta esun ku lo mester husga si e maneho ta bon si òf no.

Finalmente nos ke konsehá gobièrnu pa paga masha bon tinu i hasi un bon evaluashon di tur interesnan, promé ku bini ku maneho nobo riba outonan ku stürwil banda kontrali. Un posibel desishon pa saka esakinan for di sirkulashon, na nos pareser lo no por drenta na vigor, promé ku gobièrnu a presupuestá un montante di plaka supstansial pa paga daño i perhuisio na doñonan di e vehíkulonan aki.

Pa tuma kontakto ku abogado Conquet por hasi esaki via email: [email protected]  òf na kantor di abogado Johannes Advokaten na e numbernan 527-0622 òf 888-1883

Fuente: Vigilante