“Awa a pasa hariña” : Tiroteo entre gang den un Nissan Cube y polis na Bushiri

Palm Beach – Bushiri

Diasabra marduga algo pasa di 3’or un unidad di recherche ta bin topa cu un pelea, ariba parkeer plaats di The Village. Na e mes momento nan ta constata cu un di e personanan envolvi, lo ta den posesion di un arma di candela.

E persona aki lo ta logra bandona e sitio den un Nissan Cube blanco, cu a sali cu velocidad halto direccion Riu.
Mes ora a pidi pa refuerso.

Altura di luznan di trafico di Superfood, e lo a para den luz cora, pero momento cu ela ripara cu patruyanan lo ta yegando a cuminsa move un biaha mas y den e maniobra aki e chauffeur ta manda e auto ariba polisnan.

Persecusion a start atrobe

Direccion rotonde Sasaki e ta bay ariba y despues ta drenta Schotlandstraat, na e momento eynan ya tin varios unidad policial, tanto uniforma y no uniforma tras di e auto aki.

Altura di Katra e ta bay links, pues ariba e caminda di tera patras di go kart.

Tironan a cuminsa cay

Ariba e caminda aki, esnan den e Nissan Cube a cuminsa los tiro ariba polisnan.
Mes ora autoridad no a duda y tambe a cuminsa los varios tiro bek ariba e Nissan Cube.

Na final di e caminda nan ta logra detene tur esnan den e auto, cu tawata cuatro. Tres homber y un dama.

Ambulance ta wordo pidi cu urgencia.

Ambulance a wordo pidi cu urgencia na prome instante, paso tawata mustra cu un di e ocupantenan lo a haya un impacto di bala.
Despues e sospechoso mes a bisa polis cu e bala lo a rasca su curpa bay. No ta conoci con serio e herida ey tawata, pero asina mes ela wordo transporta pa hospitaal.

Polis ta transporta e otro sospechosonan pa warda di Shaba, caminda cu ariba e imagen por wak e dama cu tawata hunto cu e tres hombernan.

Tur esnan envolvi ta personan local.
Loke a pasa ta pone tur hende para keto un rato y realisa con nos cayanan a bira. Un arma di candela, cu ta un arma mortal por ta den cualkier auto of den saco di carson di cualkier persona ey fo nan.

E grupo aki no a respeta autoridad y ta los tiro ariba nan. Pues e chance cu nan lo yega y tira un ciudadano tambe ta hopi mas grandi.

Leave a Reply

Your email address will not be published. Required fields are marked *

*