Atracadornan arma ta drenta camber di un mama y su 4 yiunan, si no a duna nan placa nan lo a bay cu e baby

Jaburibari – Diabierna anochi den careda di 9:45 un cas humilde situa patras di e post di Polis di Bario ta wordo atraca door di 3 homber arma.

Un cas di un famia humilde por bisa. E atracadornan aki tawata asina dicidi cu nan a pasa man pa e baby di e dama y menasa e dama di lo bay cu su baby, si nan no haya placa. E señora tawata den su camber hunto cu su 4 yiunan, momento cu e atracadornan a drenta su camber. Niun tawata tin cara tapa.

Nan ta logra bay cu mas o menos 750florin.
Polisnan cu a yega na e sitio a notifica loke a pasa y asina un buskeda a cuminsa rond. Segun nos por compronde e personanan aki lo a papia spaño.

No ta conoci ki direccion nan lo por bay.

E atraco aki ta uno cu henter pueblo di Aruba mester para keto y realisa con serio criminalidad ta aki na Aruba y e velocidad alarmante cu e ta keda subi.

Loke a pasa na Jaburubari ta cuminsamento di loke nos lo por bay spera den un futuro no mucho leu, esta atraco cu secuestro. Nos ta convivi e momento di terror cu e mama lo a pasa aden, ora algun homber desconoci arma kier a bay cu su baby.

Diabierna anochi Aruba a conoce su di 52 atraco y nos no a pasa mita aña ainda. Parti mainta ariba e mes un diabierna aki, tawata tin un atraco arma pazuid di postkantoor na Playa, esaki a sosode algo prome cu 12’or di merdia, pues den menos di 12 ora Aruba ta conoce dos atraco arma.

Atraco team y tambe slachtofferhulp a presenta na Jaburubari pa investiga y slachtofferhulp pa yuda e mama y su yiunan cu sigur lo keda den un trauma pa basta tempo.

Leave a Reply

Your email address will not be published. Required fields are marked *

*