Aruba Ports Authority ta adkiri e Tugboat di mas moderno den henter Caribe

AIB-Bank a financia compra di tugboat di marca Damen

Aruba Ports Authority ta adkiri e Tugboat di mas moderno den henter Caribe

 

Aruba Ports Authority a firma un acuerdo di compra cu e compania DAMEN Shiprepair Curaçao y un acuerdo cu e compania Svitzer Caribibbean kende a keda encarga cu e supervision durante construccion y transportacion di e tugboat nobo, esta e “Damen Azimuth Stern Drive Tug 2811”. Tambe a firma cu AIB-Bank cu a percura pa e financiamento. Ing. Jossy Figaroa, Director di Aruba Ports Authority a corda tur hende cu Aruba Ports Authority tabata tin un Tugboat cu tabata yama Andicuri, pero 2 aña y mey pasa a sak’e for di servicio debi cu el’ a bira hopi bieu. E tempo ey APA no tabata den un situacion financiero cu por a cumpra un boto nobo, pa cual a opta e ora pa “lease” un tugboat pa 2 aña, cual termino ta vence na December proximo. A bisa di e tempo ey caba cu si despues di 2 aña e situacion financiero ta mihor, cu e ora si lo opta pa cumpra un tugboat nobo.

Na un prome instante APA a evalua pa cumpra un Tugboat cu nan tin den waf caba, cu no ta di nan, pero cu t’ey pa 2 aña caba. Pero na caminda a cambia di opinion y a opta pa cumpra un nobo mes. “Cu esaki nos ta prepara pa e siguiente 25 añanan, nos hendenan sigur lo sa di cuid’e y manten’e”, asina Ing. Jossy Figaroa a bisa den forma orguyoso.

APA tin un bon relacion cu Damen y pesey a scoge pa e marca ey. E motibo ta cu e dos Tugboatnan na CITGO tambe ta di e mesun marca y tambe a considera cu e tin un centro di servicio y mantencion na Corsou, pues masha cerca di cas.

E Tugboat ta di 28 meter di largura y 11 meter di hanchura. E boto ta suficiente fuerte pa haci tur trabao necesario y por us’e tambe pa yuda CITGO.

Lodewijk Franken, gerente di Damen Shiprepair Curaçao a enfatiza cu a dura mas o menos 1 aña pa por a alcanza na e momento aki, unda ta firma un acuerdo di compra formal. El’a conta cu e compania Damen a expande hopi den e region aki y cu awor nan por presenta nan mes y ofrece servicio cerca den Caribe mes. Lodewijk Franken a bisa cu Aruba mester ta orguyoso pasobra ora inaugura e tugboat aki, e lo ta e prome den henter Caribe. Aruba Ports Authority lo dispone di un tugboat ultra moderno, e ultimo generacion y esun di mas moderno. Ta un boto masha stabil cu lo por ofrece mas y mihor servicio. Damen Shiprepair Curaçao ta contento di por intermedia, pasobra nan servicio ta pa brinda servicio di mantencion.

Lo construi e boto den Vietnam, lo transporte pa Corsou, unda lo haci algun adaptacion na dje. Ora caba e mesun capitannan di APA lo nabega cu e tugboat for di Corsou pa Aruba. Damen a sigura cu den 60 dia despues di e firmamento di e acuerdo, lo entrega e Tugboat nobo na Shipyard di Vietnam, pues net prome cu fin di aña pa despues transporta esaki pa Corsou na unda lo haci algun adaptacion pa despues pa final di Februari 2019 of comienzo di Maart 2019 lo ta yegando Aruba.

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.