AREA TA SIGUI CU PROYECTONAN INNOVATIVO Y YEN DI AMBIENTE PA TRECE BIDA BEK DEN NOS CENTRO DI CIUDADADNAN Comercio tambe lo haya un boost den e temporada di fin di aña

Prome Minister, mr. Evelyn Wever-Croes:

AREA TA SIGUI CU PROYECTONAN INNOVATIVO Y YEN DI AMBIENTE PA TRECE BIDA BEK DEN NOS CENTRO DI CIUDADADNAN

Comercio tambe lo haya un boost den e temporada di fin di aña

E temporada mas dushi di aña ta acercando y nos comunidad como costumber ta probecha e dianan di fin di aña pa haci compras y un biaha mas disfruta di e ambiente cu ta wordo ofreci den centro di nos ciudadnan.

Prome Minister, mr. Evelyn Wever-Croes, a duna un resumen hopi elabora riba e proyectonan pa trece bida bek den centro di nos ciudadnan, esta San Nicolas y Oranjestad. Pa haci e trabaonan mas eficiente, Gobierno di Aruba a institui e plataforma AREA pa asina trece bida bek den nos centro di ciudadadnan.

Den e luna di Juni a instala un Steering Committee cu ta conta cu participacion di Camara di Comercio, ATIA, ATA. E Steering Committee, entre otro, tabata tin e tarea pa trece hunto 2 task force, un pa Oranjestad y un pa San Nicolas, pa asina cuminsa cu e proceso di desaroya un plan pa e ciudadnan aki, pero tambe atende cu quick-wins, kico ta loke nos por haci riba termino cortico.

Por a tuma nota di diferente anuncio riba tereno di maneho entre otro, Minister Chris Romero a anuncia e maneho nobo di parkeo na Playa: e oficina di Turismo na San Nicolas lo habri bek cu mas innovacion; e concepto nobo di Island Fest cu Minister di Turismo lo elabora mas riba dje; tambe trabaonan ta tumando lugar pa amplia e acceso na WIFI den centro di Playa y San Nicolas. Esakinan ta djis un paar di ehempel di quick wins pa por trece bida bek cu ta canando den paralelo cu e plan pa termino largo.

E task force’nan ta consisti door di diferente persona kendenan ta activo den e ciudadnan aki, como tambe, comerciante, entrepreneurs, personanan cu background financiero, esnan den mundo creativo y tambe academic. Prome Minister a expresa cu e ta sumamento agradeci na e Task Forces y Steering Committee pa nan dedicacion y trabao voluntario pa por mira bida bek den nos centronan di ciudad.

E ultimo lunanan aki tabata tin diferente reunion cu stakeholders y hunto ta desaroyando un plan di accion. Den luna di November Gobierno lo duna un resumen di e desaroyonan y tambe lo introduci e miembronan di e Steering Committee y di e Task Force’nan di Area.

Pa Centro di ciudad Oranjestad, Caya G. F. Betico Croes lo bin actividadnan di fin di aña. Pronto lo publica un “Live Calendar” di evento. E calendar aki lo duna tur informacion di actividadnan cu lo tin den caya di awor te cu fin di aña pa asina trece bida bek y tambe duna comercio un boost cu e periodo importante aki cu ta den porta.

Señora Lindy Croes a wordo apunto como e persona cu ta encarga cu eventonan pa Area Oranjestad. Lindy ta coordinando e trabaonan pa haci e eventonan aki un realidad. Lindy lo percura pa tur informacion yega di cada actividad cu tin plania.

E prome actividad grandi lo ta dia 2 di November na unda na un forma festivo lo cende e luznan di Pasco bao animacion musical cu canticanan di Pasco. Prome Minister ta extende un invitacion cordial na henter Aruba pa bini hunto cu famia pa asina hunto yama bon bini na e temporada aki di Pasco den nos centro di ciudad Oranjestad. Pronto lo brinda mas informacion pa cu e evento di di inauguracion di, “City of Lights”.

Prome Minister Evelyn Wever-Croes: “Laga nos imagina pa un rato, awe nochi, Caya G.F. Betico Croes ta keto y sin ambiente. Pero entrante 2 di November, ta bay tin luznan di Pasco, Musica di Pasco, Fonteinnan ilumina, caya y tiendanan y decora, famianan ta cana contento, tiendanan habri te laat pa brinda esnan cu ta traha oportunidad pa haci nan compras. Asina aki, Gabinete Wever-Croes ta trece bida bek den centro di Oranjestad den e temporada di fin di aña”.

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.