Accidente frontal na Pos Chikito, entre un Nissan y un Mitsubishi. Un ocupante a resulta seriamente herida

Pos Chikito: Diasabra algo prome cu 3’or y mey di marduga, durante cu patruya di San Nicolas tabata riba e caminda principal, na altura di Palmita ta sosode un accidente frontal nan dilanti.

Mesora e agentenan a manda pidi pa presencia di ambulance cu urgencia mirando cu na prome instante tabata mustra cu tin dos persona seriamente herida, un di nan tabata tin un corta grandi na su brasa links y kap na cabes.

Na yegada mesora personal di ambulance a controla tur e ocupantenan di e autonan y un di e heridonan a wordo transporta cu urgencia pa hospital.

E motibo di e accidente no ta mucho cla, na e sitio tabata tin dos version ta circulando. E prome tabata e version di e personanan di e Mitsubishi Lancer, kendenan tabata bisa cu un auto lo a sali nan dilanti cu consecuencia, cu nan mester a hala pa e auto y a bay dal contra e Nissan Fuga cu tabata biniendo di direccion contrario.

Na e sitio tambe algun testigo tabata comenta cu aparentemente cu un rato prome nan a mira un di e autonan aki ta pusta cu un Toyota Celica Blanco riba e caminda di San Nicolas pa Pos Chikito.

Pa evita declaracionnan contradictorio, e polisnan na e sitio a pidi pa presencia di specialista di trafico pa haci mas investigacion. Mas sigur mirando e tantisimo daño material. No ta descarta e posibiliad cu velocidad halto lo a hunga un rol grandi den e accidente frontal aki.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.