Accident cu 7 persona herida na e crusada dilanti Veterinaire Dienst na Barcadera

Barcadera: Diadomingo pa mas o menos 10’or y 15, ta sosode un accident basta serio riba e caminda di Barcadera na e crusada net pabou di DTI, mesora ta manda polis y ambulance cu urgencia na e sitio.

Na yegada nan ta bin compronde cu un Ford Mustang shinishi biniendo di panort, no a duna preferencia na e Suzuki Swift shinishi cu tabata biniendo di pariba, e impacto tabata hopi fuerte cu e Suzuki Swift a bay cay algun meter leu den mondi den matanan di Hubada. Den e Suzuki tabata tin 5 persona, tur 5 a keda herida, cual dos a keda pega den e auto y tabata mas serio, mesora polis a pidi cu urgencia pa presencia di materiaalwagen di brandweer pa libera e dos victimanan cu tabata pega. Den e mustang tabata tin dos mucha cu a keda levemente herida.

Mesora personal di ambulance a cuminsa trata cu e heridonan, mientras personal di brandweer a yega na e sitio y a saca e dos victimanan cu tabata pega den e Suzuki Swift.

Varios unidad di ambulance a yega na e sitio y despues cu personal di ambulance a trata tur 7 heridos, a transporta 6 herido pa hospital. E cinconan di e Suzuki Swift y tambe un mucha chikito cu tabata den e Ford Mustang a wordo transporta cu ambulance pa hospital.

E caminda a keda pa basta rato cera y a pidi pa un specialista di trafico pa haci mas investigacion.

One comment

  1. A para bira aki na Aruba: cu bo tin preferencia of no, miho wak si nan ta dunabo bo preferencia. Ami ta corre 60 km pa ora so, tur dia, desde cu mi a ripara cu na Aruba tin hende no sa ken tin preferencia, piio den un cruzada igual. Mas atenshon bo pone, mihor bo cuida bo mes.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.