A.T.A. TA LAMENTA DISTRUIBIMENTO DI INFORMACION CARRYING CAPACITY

PRESENTACION COMPLETO DI CARRYING CAPACITY RIBA REDNAN SOCIAL SIN A ASERCA A.T.A.

For di 2017 A.T.A., como e autoridad di turismo aki na Aruba, a bin ta traha riba un estudio di ‘Carrying Capacity’, esta e capacidad di carga pa cu turismo di Aruba. Esaki ta un di e accionnan cu A.T.A. a compromete su mes di ehecuta como parti di e rapport ‘Cu Mira Pa Futuro’ cual a wordo finaliza na Juni 2017.

Como tal, A.T.A. cumpliendo di su parti totalmente cu e accionnan stipula den e documento di desaroyo di e producto turistico ‘Cu Mira Pa Futuro’, a bin ta traha riba e estudio di capacidad di carga. Como parti di e proyecto aki, A.T.A. tin un paar di luna ta dunando presentacionnan di diferente analisis y conclusionnan preliminario na diferente partido importante aki na Aruba. E rapport di e estudio lo ser finaliza den e proximo lunanan.

Ta usa seccion di presentacionnan pa informa y sigura cu ta tene cuenta cu loke e estudio di capacidad di carga ta indica. Input di esnan cu ta ricibi e presentacionnan aki, ta yuda A.T.A. den su proceso pa optimaliza e informacion cu ta forma parti di e estudio en cuestion, pa eventualmente haci e ahustacionnan necesario pa asina – ora cu finalmente finalisa e rapport – esaki ta uno completo y corecto.

Como parti di e trayecto, A.T.A. no solamente a bin ta duna e presentacionnan aki a base pro-activo (y tambe mester bisa a base di peticionnan cu (t)a drenta), pero tambe A.T.A. a comparti algun informacion ya caba publicamente pa asina substancia diferente mensahe clave pa nos comunidad y pa tur esnan concerni.

Asina por tuma nota di e hecho cu CEO di A.T.A. a comparti diferente informacion (preliminario) di e estudio di e capacidad di carga riba 27 di September ultimo, ora cu a celebra e Dia Internacional di Turismo.

Por a nota tambe cu recien varios otro entidad y individuo den nos comunidad a comparti cierto informacion di e estudio di capacidad di carga.

Esaki, na un manera corecto, sinembargo na mesun momento lamentablemente tin informacionnan cu no ta wordo treci na tur momento dilanti riba un manera corecto. Esaki A.T.A. ta lamenta profundamente. A.T.A. ta reconoce cu tin hopi interes y necesidad pa cu informacion y ta p’esey entre otro a asumi e responsabilidad di conduci e estudio aki. Recien, A.T.A. a tuma nota di un version di e presentacion completo cu a wordo exponi riba rednan social, sin consentimento di A.T.A. Aunke ta reconoce e hecho cu kier contribui na distribuimento di informacion, A.T.A. como entidad cu ta pone hopi enfasis riba produccion di tipo di rapportnan asina y e calidad di e analisis y informacion, tin su mesun trayecto planea pa loke ta trata distribuimento di e informacion aki publicamente. A.T.A. pues na su debido momento lo haci esaki ora cu tur e informacion ta finaliza, procesa y cla pa comparti.

Mirando e funcion di A.T.A. a pidi na esnan cu a comparti e informacion riba rednan social pa respeta e proceso di A.T.A. pa cu su estudionan y pa kita esaki, asina brinda A.T.A. espacio pa por sigui cana su trayecto, cu mas cu claro ta encera e distribuimento na su debido tempo di e informacion na un manera corecto y completo.

A.T.A. semper a mustra di ta dispuesto pa comparti informacion y ta sigui mantene e posicion aki. Por nota cu entre otro e plan di ‘Cu Mira pa Futuro’ ta disponibel pa un y tur su uso, mas cu claro na un manera responsabel.

E topico di ‘capacidad di carga’ ta uno sumamente importante pa nos pais y lamentablemente compartiendo un presentacion completo di A.T.A. di e manera cu el’a sosode den fin di siman cu a pasa ta conduci na confusion y discusion cu no necesariamente ta uno productivo pa nos pais y cu kizas ta te hasta contra productivo. Ta pidi pa respeta e trayecto serio cu A.T.A. ta cana pa cu su estudionan, entre cual tambe e estudio specifico aki y pa duna e aporte debido, pero na un manera etico y na su debido momento.

 

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.