Polis ta controla auto sospecheso cu 4 persona aden y ta topa cu un persona ilegal

Malmok: Diasabra algo prome cu 3’or y 45 di marduga, un security guard atento ta yama polis pa un auto cu 4 persona den dje haciendo basta sospechoso dilanti di e entrada di Tierra del Sol.

Mirando cu ultimamente tin hopi ladronicia den e area aki, mesora a manda un patruya di polis pa bay haci un control, dos otro patruya cu tabata cerca tambe a bay tira bista.

Na yegada e polisnan ta topa cu e V car, Hyundai I10 para dilanti entrada di un cas un poco mas pabou. Den e auto nan ta topa cu 3 dama y un homber, tur tabata di e nacionalidad Venezolano.

Mesora e agentenan na e sitio ta haci control di nan papelnan y a bin resulta cu un di e damanan, e dama cu tabata na stuur di e auto, su papelnan no tabata na ordo y tabata ilegal riba nos isla.

E dama a keda deteni y cu transportwagen di polis a wordo transporta pa Iasa na Sabana Berde pa cuminsa regla su regreso pa Venezuela, mientras e otronan cu si nan papelnan tabata na ordo por a sigui cu nan trip, pero sin chauffeur. Aparentemente e personanan aki lo tabata riba un trip y kiko tabata e motibo cu nan a para net dilanti di e cas aki no ta conoci.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.